-Finaliza o curso para a aula da UNED Foz. Cal é a valoración deste curso e das actividades que se realizaron?
A valoración que facemos é positiva, este curso foi un éxito co aumento de alumnado, algo que se deixa sentir de maneira paulatina ano a ano. Isto vese tamén na parte de Extensión Universitaria onde este ano chegamos aos 2.000 participantes. Sobre actividades, houbo entre corenta e cincuenta durante todo o curso que en realidade son oito ou nove meses.
-Cales son as propostas da UNED que reciben maior número de alumnado?
Sobre todo aquilo relacionado con psicoloxía, empoderamento e autocoidado. Agora mesmo Psicoloxía Positiva está tendo moita demanda. Contamos cunha poñente, Alba Burundarena, que leva varios anos colaborando coa UNED, mais tamén o éxito vén da súa parte porque é ela quen deseña esas actividades demandadas pola xente. A Aula da UNED é un espazo aberto por iso quixemos abrila aos e ás estudantes e así poidan demandar o que necesiten. Por exemplo, o CELGA, que é moi demandado por necesidades como oposicións, etc. Por iso, moitas veces é o alumnado quen pide determinadas actividades relacionadas con temas que lle son necesarios.
-Como é a colaboración entre Concello e Aula UNED?
A colaboración é total, contamos coa concelleira de Educación, Elena Martínez Pena, facemos reunións periódicas para ver como vai indo toda a oferta que estamos lanzando. De cara ao ano que vén, tivemos reunións con outras concellarías como Turismo e Cultura coas que colaboraremos de xeito directo, pois moitas das nosas actividades teñen que ver con moitos deses ámbitos, non só co educativo. O Concello tamén nos serve como altofalante para difundir as propostas. En definitiva, estamos satisfeitos coa colaboración aberta durante estes anos.
-Desde a Aula da UNED en Foz impartides formación propiamente universitaria?
Si, aquí impartimos as materias do curso de acceso á Universidade para maiores de 25 e 45 anos, isto semanalmente. Tamén repartimos materias de graos como Historia, Turismo, Administración e Dirección de Empresas. Somos soporte activo da UNED como institución na que podemos pensar todos como sería a UNED nacional.
-O día 15 de maio ides organizar unha ruta con saída da Igrexa de San Acisclo e guiada por Pedro Rolle, experto en biodiversidade e que é autor do caderno Flores de Primavera do Valadouro. Cal é a finalidade deste roteiro?
Pedro Rolle é un colaborador da Aula e durante este período lectivo fixemos un curso de extensión universitaria sobre plantas medicinais e que tivo moito éxito. Con Rolle fíxose unha saída para a procura de plantas medicinais para elaborar pomadas. Con el fixeramos unha actividade final o ano pasado que era un roteiro pola zona de Malates, xunto á ría de Foz. Nesa saída centrámonos na flora e fauna. Este ano centrámonos máis na flora que temos ao pé en base ao caderno que editou. El vive en San Acisclo, así que por movernos máis alá do casco urbano e así queremos darlle valor ás parroquias.
-Como organizades as ponencias realizadas na Aula da UNED?
Antes de contestar quero darlle as gracias a todos e todas as poñentes que se achegan á nosa aula. Son persoas que veñen de colaborar noutros anos e ademais, outros anos hai cursos de Extensión Universitaria e que o repetimos e con algúns imos coa quinta ou sexta edición. Nese sentido, xa son persoas que coñecemos mais noutros temas son persoas que buscamos especificamente para cursos que non impartimos até o momento. Para iso imos contactando con persoas que poden dicirnos quen pode ser a persoa máis axeitada. Se ao final é quen imparte esa ponencia, dámoslle liberdade para articular a ponencia que nós pensamos nun inicio: horas, actividades, etc. Unha vez aprobada, a persoa que está na aula en Secretaria, vai facer o traballo de cadrar datas e espazos para impartir a ponencia.