A Garda Civil detivo a un veciño de Foz, de 23 anos de idade, como suposto responsable de roubar moedas e bebidas alcohólicas dun bar tras romper a porta de cristal cunha pedra.

Os feitos ocorreron a pasada madrugada nun establecemento de hostalaría da mesma localidade. Os axentes arrestaron ao mozo no momento no que tentaba abandonar o interior do local cunhas moedas e varias botellas.

O detido, ao que se lle imputa un delito de roubo con forza nas cousas, xunto coas dilixencias policiais practicadas serán postos a disposición xudicial.

FURTO NUNHA CASETA DE OBRA

Por outra banda, a Garda Civil investiga a outros dous veciños de Foz, de 63 e 58 anos, como supostos autores dun furto cometido nunha caseta de obra. Posteriormente, o obxecto subtraído apareceu á venda nunha web de segunda man.

A denuncia interpúxose o pasado 8 de febreiro, o que permitiu identificar a estes dous homes. As dilixencias policiais e as persoas investigadas foron postas a disposición xudicial.