O presidente da Deputación de Lugo, José Tomé Roca, asinou esta semana xunto ao alcalde de Foz, Francisco Cajoto, un convenio de colaboración a través do que a institución provincial destinará 115.000 euros para renovar o firme e realizar o repintado completo das rúas Alfonso X e Alfredo Brañas.

Tomé enmarcou esta iniciativa na “cooperación, intensa e continua” que mantén co Concello de Foz e co resto de municipios, para que poidan ofrecer “máis e mellores servizos aos veciños”.

Segundo recolle a Deputación nun comunicado, Tomé lembrou que esta actuación financiaraa na súa totalidade o organismo provincial, pero enmárcase na aposta do goberno local de “facer de Foz un lugar máis moderno, seguro e pensado para o benestar da xente”.

“Con esta iniciativa non só melloramos a circulación e a seguridade nas rúas, senón que tamén aumentamos o atractivo de Foz, o que favorece á súa dinamización social e económica, tanto para os veciños como para os visitantes”, engadiu o presidente.