A Asociación de Veciños “O Vencello” de Burela presentou esta semana un escrito no rexistro municipal para expoñer “só algunhas das carencias máis significativas no Concello e que levamos expoñendo reiteradamente nas distintas xuntanzas mantidas co Alcalde, Alfredo Llano e co tenente de Alcalde, Ramiro Fernández”.
Segundo “O Vencello” a falta de mantemento pódese ver “na zona recreativa do Cantiño, cuxa área de mesas está nun estado ruinoso cos seus valados rotos“. A mesma asociación sinala que aínda que “esta área forma parte do espazo competencial de Costas, a responsabilidade directa do seu mantemento é do Concello”. A mesma asociación sinala o abandono que tamén sofren os paseos marítimos e “outras áreas verdes e de lecer das que dispoñemos na vila, todas elas nun estado de abandono máis que evidente”.
ELEVADOR XULGADO DE PAZ
Tamén apuntan a necesidade de reparación do elevador na antiga praza de abastos, “que debería dar servizo ás dependencias do xulgado de paz e noutras dependencias, como Gaia ou a Fundación Expomar”.
Lembran que este elevador é único acceso que teñen veciños con mobilidade reducida para realizar trámites ou consultas nas oficinas públicas que alí se atopan. En relación a isto, “O Vencello” asegura que “segundo conversa mantida o pasado 6 de maio co señor Ramiro Fernández, os traballos para arranxar este ascensor xa están adxudicados”.
A Asociación de Veciños valora positivamente o anuncio do concelleiro e “só esperamos que a súa posta en marcha non se alongue máis do debido, porque en todo este tempo o Concello non ten feito nada, salvo anuncios e propaganda”.
ANTIGA CASA DE TÉLEFONOS EN PERIGO DE DERRUBO
Por último, solicitaron ao equipo de goberno que actúe na coñecida como «A casa de Teléfonos»; inmoble situado na avenida Arcadio Pardiñas que albergou as instalacións da Compañía Nacional de Teléfonos ata a década dos anos 70 do século pasado.
Segundo a asociación, o inmoble está nun estado de ruína e ameaza con caer polo seu peso, “sen que o Concello faga nada ao respecto e co conseguinte perigo para os viandantes e os vehículos que pasan a diario fronte del“.