A Concellería de Turismo fai un balance positivo da presenza, un ano máis, de Burela en Turexpo, na Feira Semana Verde de Galicia durante esta pasada fin de semana. O domingo día 5 de setembro tivo lugar unha degustación de bonito na que se serviron 300 racións en diferentes preparacións. O edil, Ramiro Fernández Rey, mantivo contacto con varios blogguers aos que lles presentou os atractivos turísticos do concello burelés.
O concelleiro de Turismo relatou que “esta fin se semana estivemos na Semana Verde de Galicia, en Silleda. Alí tivemos o noso stand onde promocionamos todos os produtos turísticos do concello ademais da Feira do Bonito”. A lectura que fai Fernández da asistencia a esa feira é moi positiva en tres aspectos. O primeiro é que o stand foi moi visitado. “Houbo moitísima xente que se interesou polos recursos turísticos que ofrecemos en Burela”. A continuación fíxose unha degustación de bonito o domingo, onde repartimos 300 racións de túnido en diferentes preparacións, “unha delas era en albóndegas, outra en empanada e outra en salpicón. Esta degustación tivo un grande éxito”.
Fernández Rey tivo tamén palabras de agradecemento: “queremos agradecer a Ledicia, que foi a encargada da elaboración do bonito polo traballo feito e o que nos axudou para poder levar a cabo a degustación. Tamén queremos agradecer a ABSA, que nos doou o bonito para poder facer a degustación”.
O edil burelés subliñou que “outro aspecto importante foi que tivemos contacto con varios blogguers tanto turísticos como gastronómicos“. Este contacto pode ser bo para o turismo de Burela segundo o concelleiro. “Tamén agradecemos a Conservas Faro de Burela, que desinteresadamente nos regalou dúas caixas con produtos que elaboran na súa conserveira para sortear entre os blogguers”.
E engadiu: “en definitiva, facemos un balance positivo desta feira á que xa levamos varios anos indo. Estamos contentos de poder asistir a ela. Entendemos que é unha feira moi interesante para o turismo que temos en Burela e imos intentar estar nela sempre que sexa posible facendo degustacións e dando a coñecer todos os atractivos turísticos de Burela”.