A quinta edición do Certame Internacional de Pintura Mural Amarte chega a Burela para decorar o muro do peirao. Dende este xoves 5 ata o domingo día 8 de agosto ás 11.00 horas, 8 artistas internacionais plasmarán nese lugar as súas creacións.

O Certame Amarte coincide todos os anos coa Feira do Bonito, pero que este ano, igual que o pasado, non se celebrará no seu formato habitual por mor da covid. No seu lugar, 20 locais hosteleiros ofrecerán tapas, menús e racións elaboradas con bonito de Burela. O concelleiro de Cultura de Burela, José Díaz, afirmou que a pesar das circunstancias se realizarán “actividades seguras que homenaxeen esta Feira de interese turístico nacional dende o 2019″.

Ademais, a vila acollerá outras actividades paralelas como un concurso de selfies -cuxos premios se entregarán o domingo-, un obradoiro de grafiti para nenas e nenos a partir de 9 anos e unha actuación do Mago Antón. Pola súa banda, Luar na Lubre, Tribu Folk e Eladio y Los seres Queridos animarán con música as rúas de Burela. Para os concertos recoméndase previa inscrición na Casa da Cultura.