Unhas 500 persoas con discapacidade intelectual galegas participarán o vindeiro venres, 5 de abril, nun simulacro electoral organizado por FADEMGA plena inclusión Galicia. Entre elas, cidadáns da Mariña Lucense, en Viveiro e Burela.

A votación en Burela celebrarase no consistorio burelao, coa colaboración da Fundación Eu Son. En Viveiro, os usuarios de Aspanane ensaiarán o seu voto de cara ás eleccións xerais e municipais de maio no concello viveirense. As dúas convocatorias serán de 11.00 a 13.00 horas.

O simulacro únese a moitos outros celebrados en comunidades como Madrid, Asturias, Castela e León ou Valencia, co obxectivo de celebrar o cambio histórico que supón a aprobación do dereito ao voto para os discapacitados intelectuais, tal e como recolleu nunha reportaxe o Xornal da Mariña.

MATERIAL ADAPTADO

A convocatoria tamén ten a intención de reclamar a necesidade de material adaptado para unha lectura doada de cara a “exercer este dereito en igualdade de condicións ao resto dos cidadáns”, e de analizar e avaliar posibles dificultades para solventalas de cara aos comicios.