A Fundación Expomar organizou esta semana en Burela as súas 33ª Xornadas Técnicas e o 27º Encontro Empresarial, coa cofinanciación da Consellería do Mar da Xunta de Galicia e o fondo Europeo Marítimo, de Pesca e de Acuicultura 2021-2027.

O salón de actos da Confraría de Pescadores de Burela acolleu este xoves as XXXIII Xornadas Técnicas de Expomar, cuxa apertura correu a cargo da conselleira do Mar da Xunta de Galicia, Marta Villaverde, acompañada polo director general de Pesca Sostenible do Ministerio de Agricultura, Pesca y Alimentación, Ramón de la Figuera, e a presidenta da Fundación Expomar e alcaldesa de Burela, Carmela López.

Ao longo da mañá celebráronse tres mesas de debate, que estiveron moderadas pola xornalista Lucía Rodríguez, e nas que se trataron as principais preocupacións da pesca.

Na primeira delas debatiuse sobre a “xestión pesqueira” desde as diferentes visións do sector e a administración, coa participación de Javier Garat, representando a Cepesca e Europeche, Torcuato Teixeira, no nome da Federación Nacional de Cofradías, e Ramón de la Figuera, do Ministerio de Agricultura, Pesca y Alimentación.

No segundo dos coloquios debatiron sobre “futuro, releve xeracional e formación” Francisco González, docente en EONP Gijón e ex-director general de Pesca do Principado de Asturias, Ángeles Vázquez, directora xeral de Desenvolvemento Pesqueiro da Xunta de Galicia, e Manuel Pablos López, subdirector general de Sostibilidad Económica y Asuntos Sociales do MAPA.

A sesión matinal das Xornadas Técnicas pechouse coa mesa sobre “sostibilidade, socioeconomía e consumo”, na que interviñeron os catedráticos da Universidade de Santiago de Compostela María Bastida e Gumersindo Feijóo, xunto coa nutricionista Adriana Férnandez.

A sesión de tarde iniciouse cunha presentación sobre a Comisión Nacional de Seguridad y Salud en el Trabajo, que realizou a directora general de Marina Mercante, Ana Núñez.

E as Xornadas Técnicas 2026 pecháronse cun debate político sobre a Pesca no Parlamento español, coa intervención de tres parlamentarios galegos en Madrid: Rosa Quintana, do Partido Popular, Patricia Otero, do Partido dos Socialistas de Galicia-PSOE, e Néstor Rego, do Bloque Nacionalista Galego.