A Garda Civil detivo dúas persoas como supostas autoras dun delito contra a saúde pública, na súa modalidade de tráfico de drogas.

A actuación policial iniciouse tras ter coñecemento da posible existencia de actividades relacionadas coa venda de substancias estupefacientes polo miúdo nun establecemento de ocio situado na localidade burelense. Nos últimos meses, intensificáronse as pescudas, logrando obter os investigadores indicios relevantes que apuntan á comisión de dito ilícito penal.

Finalmente, na madrugada de onte levouse a cabo un operativo no que participaron diversas unidades da Garda Civil, entre elas un guía canino con can detector de drogas. Durante a inspección do local, procedeuse á detención dos seus dous responsables, veciños de Burela, ambos de 37 anos de idade e de nacionalidade caboverdiana.

No desenvolvemento da actuación policial, os axentes incautaron varias doses dunha substancia que, a falta de análise, presenta características compatibles coa cocaína, preparadas para a súa venda e ocultas na barra do establecemento. Unha das persoas detidas tratou de desfacerse das substancias no momento da intervención.

Así mesmo, interviñéronse 285 euros en efectivo e dous teléfonos móbiles. Do mesmo xeito, formuláronse un total de oito denuncias administrativas por diversas infraccións detectadas durante a inspección, entre elas, tenencia de armas brancas, infraccións á normativa de estranxeiría, permitir fumar no interior do establecemento e carecer da correspondente sinalización de prohibición.