Dous veciños de Burela, pai e fillo, aceptaron este martes na Audiencia Provincial de Lugo unha pena de tres anos de cárcere e unha multa de 8.000 euros pola venda de estupefacientes nas inmediacións da lonxa de Burela.

Os dous alegaron que eran consumidores habituais no momento dos feitos e que actualmente están en proceso de deshabituación. Conseguiron coa súa aceptación dos feitos unha redución da petición da condena, xa que o fiscal solicitara nun principio catro anos de prisión e unha multa de 12.342 euros para cada un deles. Ademais, o Tribunal non se opuxo á petición de suspensión de condena debido ao proceso de rehabilitación.

Os feitos tratados na sesión remóntanse a 2023, cando ambos se dedicaban á distribución e venda a terceiros de sustancias estupefacientes como cocaína ou heroína. Adoitaban vender a mesma na lonxa de peixe burelense, utilizando as súas vivendas como lugar de provisión de mercadoría.

Tras un labor de seguimento das actividades dos dous acusados por parte da Garda Civil, e con probas da venda de drogas, os axentes realizaron un rexistro nas vivendas de ambos, nas que se incautaron en heroína, cocaína, psicotrópicos e material para a pesada e dosificación das sustancias, así como de diñeiro en efectivo procedente da venda.