A borrasca ‘Ivo’ entrou con forza este mércores en Galicia, co que xa é a segunda fronte que azouta a comunidade en menos dunha semana. Ante esta situación, que obrigou a activar a alerta laranxa por vento na Mariña de Lugo, a Xunta de Galicia decidía este martes pechar as escolas infantís e suspender as clases nesta zona durante toda a xornada. O CEIP Vista Alegre de Burela é un dos centros afectados. O seu director, José Manuel Díaz, percorre os corredores baleiros da escola xunto a un equipo de Europa Press e insiste na importancia de “previr” e “tomar decisións como esta” para evitar “males maiores”.
José Manuel, profesor de Educación Física e director do centro desde 2018, aínda que con máis de 30 anos de exercicio no Vista Alegre, só lembra unha vez na que se suspenderon as clases por temporal. Con todo, insiste en que, sobre todo dada a situación de danos que teñen no colexio, é o máis adecuado. “Temos, por exemplo, unhas laxas movidas. Imaxínate que vén un refacho de vento e cáelle unha laxa a un neno ou a calquera membro da comunidade educativa. Como dicía a xente maior: é mellor previr que non lamentar“, sinalou. Nestas situacións, explica, acoden ao centro á primeira hora tanto o conserxe como, aquí, o propio director, por se aparecese algún pai “descoidado”, aínda que non foi o caso este mércores.
DANOS NO CENTRO CON “UN TEMPORAL DETRÁS DOUTRO”
E é que este martes, cando recibiron a comunicación de que se suspendían as clases e máis aló das informacións oficiais enviadas mediante o programa Abalar, os propios profesores puxéronse en contacto coas familias por Whatsapp para informarlles. “Ás cinco da tarde xa estaba todo o mundo decatado”, afirmou o director. Tal e como relatou, saía do comedor (ao que a diario acoden algo máis dun centenar de menores dos 294 estudantes do centro) cando un compañeiro lle avisou da información que publicara a Consellería de Educación.
A decisión foi tomada polo ente técnico despois de monitorar a situación tras a acumulación de varios días de temporal e a coincidencia horaria coa actividade lectiva. A recomendación técnica fundaméntase en que, “ao levar varios días consecutivos de forte vento e choiva, aconséllase adoptar esta medida por precaución”. Insiste José Manuel Díaz no apropiado da decisión, polo menos en canto ao seu centro, ao que aínda non lle deu tempo de “recuperarse” dos temporais anteriores e consecutivos. Explica que, aínda que informaron a Consellería, ao concello e á construtora dos danos, con este tempo é “imposible” arranxar “nada”. “Foi un detrás doutro. O domingo empezamos e estamos a mércores”, comentou.
OS PAIS COMPRENDEN A MEDIDA
Ademais de tellas soltas e canelóns rotos, varias árbores caeron (retiradas polo propio conserxe). A isto hai que sumarlle os fortes refachos de vento, que desprazaban a zona de xogos dos máis pequenos. Tanto é así, que se viron obrigados a amarrar as casiñas e randeeiras para evitar a súa deterioración. Máis aló de que esta decisión se manteña para o que queda de semana, informa o director de que no centro continuarán coa prohibición de que os nenos de tres anos saian ao recreo ao patio de atrás e, con alerta, que ningún neno saia ao exterior durante o receso das clases. Destaca José Manuel Díaz que as familias son comprensivas tamén, posto que ao final trátase dun tema de seguridade. “Un día sen clase cámbialles a rutina completamente, claro, pero ao final enténdeno”, indicou.
BORRASCA IVO
A Axencia Estatal de Meteoroloxía (Aemet) informaba este martes dun novo episodio meteorolóxico adverso de nivel laranxa por vento intenso (con refachos por enriba de 100 quilómetros por hora), que afectaría á Mariña lucense desde primeiras horas deste mércores. Tamén informaron dun fenómeno adverso por vento de nivel amarelo, o que se deixará notar no Interior, Noroeste, Oeste e Suroeste da provincia da Coruña, no centro, Montaña de Ourense, Sur e Montaña de Lugo e no interior, Rías Baixas e zona do Miño de Pontevedra. Espérase que ambos os fenómenos se prolonguen ata a tarde do mesmo día.
Nesta conxuntura, o Goberno galego informou de que a Comisión Escolar de Alertas decretaba a suspensión da actividade lectiva nos centros educativos da zona da Mariña lucense. Esta suspensión aplícase durante toda a xornada para un total de 15 concellos do norte da provincia definidos no mapa de zonas climáticas de Meteogalicia: Alfoz, A Pontenova, Barreiros, Burela, Cervo, Foz, Lourenzá, Mondoñedo, Ourol, O Valadouro, O Vicedo, Ribadeo, Trabada, Viveiro e Xove. Nestas zonas suspenderase, así mesmo, toda a xornada o transporte escolar de uso especial.
Tamén a Consellería de Política Social e Igualdade suspende a actividade nas escolas infantís 0-3 de titularidade pública autonómica e traslada unha recomendación ao resto de centros para que adopten a decisión acordada na Comisión Escolar de Alertas. Neste órgano están representados a Dirección Xeral de Emerxencias e Interior, a Axencia Galega de Emerxencias (Axega), a Dirección Xeral de Enerxías Renovables e Cambio Climático, a Dirección Xeral de Centros e Recursos Humanos e a Secretaría Xeral Técnica da Consellería de Educación, Ciencia, Universidades e FP, a Dirección Xeral de Mobilidade e a Dirección Xeral de Familia.
OUTRAS ACTIVIDADES QUE SE SUSPENDEN
Ademais da actividade lectiva e nas escolas infantís, nunha xornada na que se esperan fortes ventos e grandes ondas no litoral galego, a Secretaría Xeral para o Deporte anunciou que se suspenderá durante a mañá deste mércores a actividade deportiva federada e do ‘programa Xogade’ en toda Galicia. Así mesmo, a actividade deportiva federada no mar quedará suspendida durante todo o día en toda Galicia.