O presidente caboverdiano José María Pereira Neves visita Burela por segunda vez, mais a anterior foi como primeiro ministro do seu país. Xa nos primeiros momentos do seu percorrido deixou claro que son moi fortes e moi importantes os lazos que unen o seu país con Burela.

Destacou primeiramente o vínculo marítimo reflectido na relación coa pesca entre os dous lugares. Así, se en Burela unha parte importante da comunidade de caboverdianos traballa no sector do mar, en Cabo Verde empresarios galegos instalaron factorías en relación tamén coa pesca.

Por outra banda, sinalou a importancia da migración que levou primeiro aos europeos ao arquipélago e posteriormente aos cavoberdianos a outros lugares do mundo, como é o caso de Burela. Neste concello hai aproximadamente 500 cidadáns procedentes de Cabo Verde censados.

Por isto mesmo, Pereira Neves concluiu recordando aos seus concidadáns residentes no lugar o papel que tiveron e teñen no desenvolvemento da Mariña ademais de térense asentado na vila como bos cidadáns e cidadás, cousa que lles permitiu seren parte da cidadanía do lugar.